لفنيق هو الصندوق لجميل الباهي، لي يحفظ صياغة مولات الدار، تخبي فيه ذهبها و كي تروح للحمام تديه معاها، و تخليه عند "مولات لفنيق" لي هي لمرى مسيرة الحمام، لفنيق يقدر يكون بالنحاس المنقوش و لا بلحطب المنحوث بالصدف
و هاذ لفنيق الهمني باه كتبت قصة من صنع خيالي و سميتها "لفنيق" لانه هو صندوق يحفظ كنز ثمين، و في قصتي الرمزية نتاعو هو أنو يحفظ كنز ثمين تاني، و هذا الكنز يتوارثو الأجيال و المتمثل في حرفة النقش على النحاس ، حكاية بطلها "عمي محسن" هو النحاحسي لي صنع هاذ لفنيق لجميل و اهداه للزوجة نتاعو"لالة سكينة" لي بعدما ماتت جابتلو في لمنام فنيق عمرو ما شاف كيفو مع حلو سطع منو نور عجيب
