Aṭas n yergazen d tulawin i d-ineǧren abrid n tmussni, i d-yefkan seg wul i tutlayt d yidles n tmaziɣt, yal wa anta taɣult uɣur icudd. Ama d ccna, ama d tira, d amezgun neɣ d ssinima… Akken ma llan uklalen tijmilin timeqqranin xersum iwakken aten-id-mmektin yemdanen, ad d-mmektin agerruj i d-ǧǧan ur nettfakka.

Gar wid i iqedcen ɣef yidles n tmaziɣt, yella yiwen wudem d ameqqran, ilaq ur t-ntettu ara, wagi d argaz ameqqran n ssinima Tamaziɣt Ɛebderreḥman Bugermuḥ, mačči aṭas-aya i d-aɣ-yeǧǧa, ɣef waya i nefren a t-id-nebder deg tesɣunt n wass-a, nebɣa a s-nerr tajmilt i yuklal, xersum d asmekti ɣef wayen i d-yeǧǧa.

Ɛebderreḥman Bugermuḥ ilul ass n 25 Furar 1936 deg Uzellagen, lwilaya n Bgayet, yettuneḥsab d ababat n ssinima n tmaziɣt, acku d netta i d ameskar n usaru amezwaru s tutlayt n tmaziɣt, “La colline oubliée” (Tawrirt yettwattun), deg useggas n 1996, d ungal n Mulud Mɛemri i d-yeffɣen deg 1952 i d-yerra d asaru. (Mlalen i tikkelt tamezwarut deg 1957, seg yimir zdin-ten wassaɣen igerrzen i lfayda n teqbaylit).

Leqraya-ines tamezwarut yesɛedda-tt deg Sṭif (Aɣerbaz amenzu), anda i yezra s wallen-is tidyanin qessiḥen n 8 Mayu 1945, d tidyanin i yedder s lqerb. Mbeɛd, Dda Ɛebderreḥman yexdem asileɣ deg usqamu aɛlayan n tezrawin n ssinima di Paris, deg useggas n 1960, uqbel ad yeqdec deg usufeɣ n tedwilin i ifazen i tiliẓri Tafransist RTF.

Mi d-yuɣal si lɣerba, deg 1963, yella gar yiɛeggalen igejdanen i d-yesbedden asqamu aɣelnaw n ssinima Azzayri (CNCA), anida i t-id-sṭaxren mbeɛd aseggas ɣef liǧal n tektiwin-is d umennuɣ-is ɣef tutlayt.

Syin mmi-s n Uzellagen ixdem neɣ yura deg 1965 aḍris i usaru (Comme une âme) s tutlayt n teqbaylit, yura-t akked Malek Ḥeddad (amyaru yettnaɣen ɣef tugdut ), maca wid yeṭṭfen taneɣlaft n yidles n wakud-nni ugin-as a t-id-yessufeɣ, ayɣer? Acku yettwaxdem s tutlayt n tmaziɣt, nnan-as a t-id-yessufeɣ s taɛrabt maca ula d netta yugi. Syin yuɣal ɣer tmurt n Fransa, yewwi asirem n usufeɣ n usenfar-is dinna, yessuter a s-t-id-ssufɣen s teqbaylit ma d asentel ad d-yili s Tefransist, i tikkelt-nniḍen ugin.
D asḥisef! D asenfar n usaru amenzu n tmaziɣt i tewwi tatut. Gar 1965 d 1968, Ɛebderreḥman Bugermuḥ yessuget timliliyin-is akked yimussnawen d yimeɣnasen n tmaziɣt d tugdut di Fransa, gar-asen: Ṭawes Ɛemruc, Besɛud Muḥend Aɛrab, Mulud Mɛemri, Ḥannuz, Mulud Baṭuc, d wiyaḍ. D iɛeggalen i d-yeslulen agraw imaziɣen (Académie berbère) di Paris, deg useggas n 1966.
Ɣer taggara n yiseggasen n 1960, tigejdit n ssinima n tmaziɣt yexdem ayendin n yisura, gar-asen: “La grive” i d-yeffɣen deg useggas n 1967. Syin yezdi akked umdakel-is Lexḍer Ḥamina deg usufeɣ n usaru “Chronique des années de braise”,
i yewwin araz -la Palme d’or- n tfaska n Cannes deg 1975. Dda Ɛebderreḥman yexdem daɣen aṭas n leqdicat i lfayda n tiliẓri Tazzayrit (ex- RTA) gar-asen ladɣa: “Les oiseaux de l’été” (1978), “Kahla ou Beida” (1980), “Cris de pierres” (1986).

Almi d aseggan n 1996 i teffeɣ targit n Ɛebderreḥman Bugermuḥ ɣer tafat, asaru amenzu n tutlayt n tmaziɣt “La colline oubliée” (Tawrirt yettwattun) ad d-yeffeɣ; fkan-as-d ttriḥ iwakken a t-id-yessufeɣ deg 1987. Mbeɛd mi yesber agguren d yiseggasen (Acku ugin-as tikkelt tamezwarut ad d-yerr adlis n Dda Lmulud d asaru deg useggas n 1968). Asaru yeẓra tafat, yeffeɣ-d, d win ara yeqqimen i lebda deg yidles amaziɣ, d tajmilt tameqqrant i yerra i Mulud Mɛemri. Ad d-nebder kan “La colline oubliée” yewwi araz “L’olivier d’or”, d asteɛref ameqqran n tfaska taɣelnawt n usaru amaziɣ deg tesɣunt-ines n 2012.

Ma nuɣal-d ɣer uḥric n tira, ur ilaq ara ad nettu d akken Ɛebderreḥman Bugermuḥ yeqdec u yeǧǧa-d isem-is deg-s, imi i d-yessufeɣ ungal-is amezwaru deg useggas n 2009, iwumi yefka isem “Anza”.

Dda Ɛebderreḥman tewwi-t tmettant ass n lḥedd 03 Furar 2013 ɣef leɛmer n 77 n yiseggasen deg sbiṭar n Bir Ṭrarya deg Lezzayer tamanaɣt, mbeɛd mi yeqqim din azal n 15 n wussan. Tamḍelt-is tella-d deg wakal ideg ilul, d luluf n yimdanen i iḥeḍren, usan-d a t-walin i tikkelt taneggarut, bla ma nettu udmawen imeqqranen n tẓuri tazzayrit (Inaẓuren, irgazen n ssinima, imedyazen…).
Iruḥ yeǧǧa-d deffir-s agerruj ur nfennu ara, ad d-yeqqim yisem-is i lebda imi i d-yenǧer abrid n ssinima zeddigen, awi-d kan ad gten wid ara iqedcen s ssfa i lfayda n tutlayt d tsekla Tamaziɣt.

 

Tameddurt : Biographie de l’auteur
Xaled Ɛecwi, ilul ass n 21 ctamber 1986 deg Sidi Ɛic. Yeɣra tutlayt d yidles n tmaziɣt deg tseddawit n Bgayet, yekfa-d taɣuri deg useggas n 2011. Imir-a yesselmad deg twilayt n Wehran seg useggas n 2015 ar ass-a deg uɣerbaz amenzu El Imam El Hewwari. Yesselmed daɣen imeqqranen aseggas yezrin. Ɣur-s isefra d yiḍrisen d kra n tullisin s tutlayt n tmaziɣt.

LEAVE A REPLY

Please enter your comment!
Please enter your name here