Souad Chemoul سعاد شمول

مولات التصاور لمعمرين بالهموم

بدات تلعب بكاميرا هاذي تلث سنين

و تعطيك نظرة على الدنيا في تصاورها بذوق حنين

الالوان اللي تركز عليهم في اعمالها

يخلوك تعشق في حزانة تصاورها

قتلها مرحبا بيك فالفقرة لي نقدم فيها الفنانين

بكل تواضع قالتلي راكي تستعملي في كلام عليا شوية خشين

قتلها حبيت خدمتك و حبيتك تفتحي بابك

عندك حس فني رهيف

و روحك هايلة و قلبك خفيف

من هاذ الباب خلينا ندخلوا لعالمك

باش تقاسمينا شوية تصاورك

كي حلات الڨصرة معاها

صرحتلي بلي الكتابة و الرسم كانوا مأواها

و هذا الى نهار فارقوها

او ولا التصوير اهم حاجة عندها

قوليلي سعاد ؛ لوكان يقولولك ارواحي تيكسپوزي تقبلي؟؟

يا مريم ، الواحد يكون عاقل ، باش نقبل هاذ الشي لازم نطور اعمالي

و رغم انها داخلة فالعشرينات

صراحة خلعتني بفصاحة هاذ الكلمات

و حسيت بلي الانسانة لي مقابلتني

راسها محطوط على  كتافها و برزانتها قتلتني

نختموها بانكم تكتاشفوا خدمتها

من خلال رابط الانستغرام ديالها

و راكم كالعادة معروضين

من خلال الروابط المحطوطين

باش تكتشفوا جميع الفنانين

و قامسوهم رايكم بكل موضوعية

باش يطوروا اعمالهم بكل عفوية

بالصحة و الراحة

بقلم : مريم

1 COMMENT

  1. Chemoula el 3ajiba .
    c bien ce quelle fait et j en suis sur quelle ira loin.loin dans un esprit artistique .je sais quelle se fou des autres truk.celebrité.argent…
    bravo et bonne continuation.

LEAVE A REPLY

Please enter your comment!
Please enter your name here