بوسعادَة
يا زايرْ بوسعادَة مرحبَا بيكْ ويا سعدكْ بالخْيارْ
يفرحْ قَلبكْ بهوَاها كي تسري في الافجَارْ
تغويكْ اللّمة كي تزهَى مع الاحرارْ
من زينْ لزينْ حتّى تلحَقْ للدُّوارْ
وتبدَا الخُطاوي والبَدية من العِمارْ
بعد العقبة على السطيح وجمال الاحجارْ
استفسرْ على القبّة واسمع قصّة دينيهْ
وحكاية الفنّ وعلاهْ ثمّا اختارْ
فحولها ويا زينْ قوالهمْ كلها اشعارْ
ملاتها العْيُون الكحّيلة في سحرها أسرَارْ
بوسعادَة عشقُوا زينهاَ سنينْ ومزالْ
قايمْ الحبّ فيها ليلْ نهارْ
تشرقْ شمسها في قلبك وتحتارْ
من زخارف نخيلها وتقول سبحان اللهْ
ما احلَى العقبة على طريقك ونسيمك يغازلْ
نماطل ونستنّى غروبْ شمسك وللجبل نعجّلْ
.. يا بوسعادَة
مريم معمري

LEAVE A REPLY

Please enter your comment!
Please enter your name here